Отфрлете го метежот на езерото Комо и истражете го Охридското Езеро во Македонија, неверојатно античко езеро со богата култура, спокоен поглед и непобедлива вредност, пишува медиумот Травел енд тур ворлд – ТТВ (Travel and tour world – TTW ), специјализиран за новости од динамичната индустрија за патувања и туризам.
Уште во долгиот наслов на текстот, „Патниците од Италија, Македонија и од Обединетото Кралство откриваат неверојатно античко езерско бегство, кое му се спротивставува на езерото Комо со богато наследство зачудувачки погледи и непобедлива вредност“, ТТВ се труди во еден здив да наведе повеќе адути на македонското Охридско Езеро, кои му парираат на италијанското езеро Комо, со елитен статус во светот на туризмот.
„Додека италијанското езеро Комо останува скапоцен камен на европското патување со своите светли води и раскошни вили, неговата убавина сега има цена – пренатрупаност. Секое лето, околу 1,4 милиони посетители се спуштаат на северното италијанско езеро трансформирајќи го неговиот спокоен шарм во раздвижен туристички центар, што понекогаш може да го намали искуството што го бараат патниците.
Но, ако барате помирна и подеднакво воодушевувачка алтернатива, упатете се 1.300 милји источно до скриениот скапоцен камен на Македонија – Охридското Езеро. Ова древно слатководно езеро е двојно поголемо од Комо и е многу помалку преполнето, што нуди недопрена убавина и богата културна позадина за оние кои сакаат да талкаат надвор од пренатрупаната патека“, се открива во текстот на ТТВ за Охридското Езеро.
Потоа се наведуваат природните карактеристики на македонскиот езерски бисер и се вели дека се протега на повеќе од 138 квадратни милји и со длабочина од 288 метри, како и дека се верува дека Охридското Езеро е најстарото езеро во Европа, старо околу три милиони години. Освен тоа, неговиот недопрен екосистем е дом на над 200 видови кои ги нема на друго место во светот, што го прави рај за љубителите на природата.
„Истражувањето на езерото најдобро се прави од вода. Традиционалните патувања со брод, како и кајаците и штиците за веслање, нудат извонредни начини да се доживее неговата мирна површина и драматичното крајбрежје. Охрид, крајезерскиот град – светско наследство на УНЕСКО и културно засолниште – изобилува со шарм, а една од неговите најпознати знаменитости е црквата Свети Јован во Канео од 13 век, сместена над езерото со прекрасен поглед, на само една кратка прошетка од главното пристаниште“, се вели во текстот на ТТК.
Меѓу местата кои треба да се откријат, за љубителите на историјата и љубопитните посетители се препорачува да уживаат во Музејот на Заливот на коските – археолошки локалитет под отворено небо изграден над вода што пресоздава праисториско село со набиени живеалишта, нудејќи редок прозорец кон античкиот живот на езерото.
Не се испушта да се спомене дека Охрид е познат и како „Ерусалим на Балканот“ благодарение на неговиот неверојатен број цркви – околу 360 расфрлани низ градот.
„По еден ден разгледување, сместете се во ресторан покрај езеро за да уживате во македонски специјалитети како бурек, вкусно ронливо печиво исполнето со месо, сирење или зеленчук. Оние кои сакаат да останат подолго, нема да имаат проблем да најдат ‘буџет-френдли’ сместување, во хотели и гостински куќи покрај езеро, достапни за само 30 фунти за ноќ.
Патувањето од ОК е едноставно. Визер (Wizz Air) нуди директни летови од Лондон Лутон до Скопје за само 86 фунти во мај. Од Скопје, Охрид е лесно достапен преку живописно тричасовно возење со такси, или четиричасовно патување со автобус“, се наведуваат и практичните опции како туристите од Велика Британија да стигнат до Охрид.
„Значи, ако барате кристално чисти води, културно богатство и бегство без гужва, Охридското Езеро можеби е најдобро чуваната тајна во Европа“, порачуваат од британскиот медиум, Травел енд тур ворлд.
