Старото градско јадро на Охрид, и покрај неговиот статус како културно наследство од особено значење, е се повеќе изложено на урбанистичка стихија и деградација – предупредуваат активистите од граѓанската иницијатива Охрид SOS, во денешното соопштение.
Оттаму алармираат дека чаршијата, која некогаш била препознатлива по старите градби и занаетчиските дуќани, „скоро сосема го изгубила својот лик и значење“.
„Иако е дел од Старото градско јадро, за кое важи посебен закон, чаршијата е препуштена на стихијата и тука секој прави она што сака, без никаква регулатива“, посочуваат од Охрид SOS.
Според нив, само неколку стари градби му одолеваат на времето, а местото сè повеќе го заземаат ресторани и угостителски објекти кои ја окупираат улицата, оставајќи „само еден тесен премин за минувачи и велосипедисти“.
„Наместо институциите да диктираат што и како може да се гради, сведоци сме изминативе децении дека тука веќе почнаа да се градат високи објекти со нетипичен стил. Не се применува ниту онаа омилена за Заводот за заштита на спомениците на културата и Музеј – Охрид факсимилна реконструкција“, стои во соопштението.
Посебна загриженост активистите изразуваат за нов градежен објект кој, како што велат, „по обем и големина отскокнува од околните градби“, и кој се гради при самиот крај на чаршијата.
„Минатата година, за да започнат градежни работи на овој дел, службите на Општина Охрид исекоа неколку децениски стебла, а од механизацијата е оштетено и партерното уредување. Но ништо од тоа не е важно, ако се знае дека институциите на прво место го ставаат интересот на поединците, наместо јавниот интерес“, обвинуваат од иницијативата.
Објектот е видлив и од страната на паркингот, а додека се предлага градот да формира стручно тело за комуникација со УНЕСКО, активистите предупредуваат:
„Неповратно го губиме културното наследство и специфичните градски четврти.“
