Четири лица се повредени во сообраќајка во Охрид.
Вчера во 13.15 часот во СВР Охрид било пријавено дека на ул.„15 Корпус“ во Охрид се случила сообраќајна несреќа помеѓу патничко возило „пежо“ со охридски регистарски ознаки, управувано од Г.К.(32) од село Лескоец, охридско и патничко возило „шкода“ со охридски регистарски ознаки, управувано од З.Д.(51) од истото село.
Во несреќата со тешки телесни повреди се здобиле сопатниците од патничкото возило „пежо“, 62-годишната Л.П. и К.П.(30), двајцата од с.Лескоец, охридско, додека со телесни повреди двајцата возачи, констатирани во Специјалната болница „Св.Еразмо“ во Охрид, информираа од полицијата.
По наредба на јавен обвинител, извршен бил увид од увидна екипа на СВР Охрид.
Тепачка на кејон:
Вербална расправија во кафе-бар на кеј „Македонија“ доцна вечерта на 27 јули прерасна во насилство на улица „Момчило Јорданоски“, при што 30‑годишниот Т.П. од Охрид доби тешки телесни повреди од удар со тврд предмет.
Според полицијата, првата кавга избувнала околу 23:45 часот меѓу П.Б. од една и Ж.М. и В.М. од друга страна. Два часа подоцна, препирката се преселила на соседната улица, каде П.Б. и Ж.М. започнале физичка пресметка во која се вклучиле уште неколку лица. Во хаосот, Ж.М. го напал Т.П. со неидентификуван тврд предмет, нанесувајќи му сериозни повреди. Повредениот бил пренесен во болницата „Св. Еразмо“, каде лекарите констатирале тешки телесни повреди.
СВР Охрид соопшти дека работи на целосно расчистување на случајот и обезбедување на докази, по што ќе бидат поднесени соодветни кривични пријави.
