„Потекнувам од докторска фамилија, и дедо ми и татко ми беа доктори, па тоа беше клучен поттик мојот избор – радиологијата, поле што бара не само знаење и посветеност, туку и срце“, вели 27-годишната Неда Маленков .
Неда е лиценциран доктор и специјализант по радиологија на УКИМ во Скопје. Вели дека секојдневието ѝ е исполнето со учење, усовршување и практична работа, а радиологијата ја гледа како поле кое комбинира наука, технологија и клиничко знаење, давајќи ѝ уникатна можност да придонесе кон здравјето на пациентите.
„Медицина значи постојано усовршување. Преку конгреси, размена на искуства и научни трудови имам можност да учам од врвни експерти и да ја развивам својата кариера. Тоа е пат исполнет со предизвици, но и со голема мотивација“, вели таа.
Изборот за медицината како професија, пак, не бил случаен. Неда потекнува од докторска фамилија, што било клучен поттик во нејзината одлука.
Неда е трета генерација доктор во семејството, после дедо ѝ, и татко ѝ. Уште од дете, полна со емпатија, решила да ја посвети својата кариера на тоа да им помага луѓето.
Во своето професионално патување, Неда учествувала на бројни меѓународни конгреси, летни школи и симпозиуми, каде што го надградувала своето знаење и искуство.
Првата можност за професионална размена ја добила во Русија, летото 2022 година – проект што, иако успешно прифатен, не се реализирал поради познати причини. Сепак, тоа не ја обесхрабрило.
Наскоро следела нова можност – размена во Истанбул, Турција, која Неда ја опишува како пресвртно искуство.
„Таквите програми се вистинска школа за живот – преку нив не само што учиш нови методи, туку и растеш како човек“, споделува таа.
„Мојата визија е по завршување на специјализацијата да продолжам да работам во Македонија како радиолог и да придонесувам за развојот на модерна и ефикасна здравствена дијагностика.
Интервентната радиологија е поле што ме фасцинира – динамична, прецизна и постојано напредна.
Сакам да се усовршувам во таа насока и да ги применам најсовремените методи и технологии кај нас и во светот“, истакнува Неда.
Иако најголемиот дел од времето го посветува на медицината, Неда секогаш се стреми да негува и други интереси.
Завршила основно музичко образование по пијано, што го смета за плус-доблест во својот личен развој, бидејќи ѝ помогнало да изгради дисциплина, креативност и чувство за хармонија – вредности кои ги пренесува и во професионалниот живот.
Патувањето, пак, е нејзина голема пасија. Било приватно или професионално, секое патување за неа е нова лекција.
„Секое патување носи нови култури, нови луѓе и нови перспективи. Тоа е начин да се инспирирам и да ја надградам својата животна приказна“.
Освен патувањата, ужива и во откривање на нови вкусови. Најмногу ја привлекува морската храна — риба и морски плодови, кои секогаш ја потсетуваат на летото и на чувството на слобода покрај море.
Особено ужива во вкусот на охридската риба, која за неа претставува спој на традиција, свежина и спомени од родниот град. За неа, добар оброк со риба е совршен начин да се опушти и да наполни енергија по напорен ден.
Активното вежбање во теретана, дружењето со пријателите и времето поминато со семејството се дел од балансот што го негува.
„Верувам дека само ако си исполнет во приватниот живот, можеш да даваш максимум и во професијата“, додава таа.
Во однос на стилот, Неда вели дека едноставноста и елеганцијата се нејзин избор и личен печат.
„За мене стилот е вродена работа, го имаш или го немаш, битно е како ќе ја искомбинираш облеката и како ќе ја понесеш. Вистинската елеганција е во едноставноста, во природниот изглед и во тоа да бидеш верен на својот вкус“.
Со посветеност кон професијата и страст кон животот, Неда ја гради својата иднина чекор по чекор – комбинирајќи медицина, патувања и лична хармонија.
„Животот е предизвик, но верувам дека со љубов и дисциплина, сè е можно“, завршува таа.
