Мухамед Муки Максуд, батето за кој цел Охрид се крена да соберит средства за неговото лекување во турција, се заблагодари на сите преку преубав статус на фејсбук:
“На денешен ден пред една година… ова беше мојот последен ден кој го доживеав со помош на оваа машина. Два месеци, секој втор ден во неделата, пет часа морав да бидам врзан за оваа машина која ја филтрираше мојата крв (хемодијализа). Бев ограничен од храна и пиење, од движење… преку ден мојот живот беше променет во секоја можна гледна точка. Покрај сето тоа морав да го погазам мојот срам и да побарам помош јавно од Вас, од секој ЧОВЕК, од секој кој има срце и човечност. Благодарение на Господ кој нѐ има створено во најубавата, најдобрата форма, па имаше многу од Вас кои ми помогнаа да ја соберам потребната финансиска помош за да ја извршиме (Турција) трансплатацијата на бубрег со мојата мајка која беше донор.
Сакам да се заблагодарам уште еднаш на сите кои беа причини на секој можен начин да се помогне и да се донира за мене. Благодарност до мојот град Охрид, до сите локали кои придонесоа за собирање на парични средства од настапите на артистите кои ме поддржаа како и од сите Охриѓани. Благодарност до Основните, Средните училиште како и Факултетот за Туризам, академскиот кадар, колегите мои, учениците.
Благодарност сакам да изразам и до другите Градови и Дијаспората кои се мобилизираа и организираа активности за собирање на паричните средства.
Благодарност до сите медиуми кои имаа голема заслуга повикот да стигне во што поголеми размери до народот односно луѓето.
Благодарност до оние кои анонимно сакаа да ми помогнат и до оние кои ми помогнаа без да ме познаваат лично, без разлика на вера, нација и боја.
Посебно изразувам Благодарност до Кирил Пецаков – Градоначалник на Општина Охрид кој несебично ме поддржа и донира 80.000 денари од поставените хуманитарни паркинзи во нашиот град Охрид.
Вашата грижа и внимание претставуваат силен поттик и охрабрување за мене, и потврда дека солидарноста и човечноста се темели на кои се гради едно подобро општество. Го молам Господ на сите Вас да Ви подари здравје, мир и спокој. Да ја олесни секоја ваша ситуација во која се наоѓате и да Ви подари излез од секое искушение. ❤️”
