На автопатот Кичево – Охрид се прават последните подготовки за пуштање во употреба на делницата од Врбјани кон Охрид во должина од околу 40 километри, со прекин кај Ботун. Кога одите кон Охрид на терен се гледа дека има многу механизација, многу луѓе и покрај главниот пат и на пристапните патишта. Со боја се исцртуваат коловозните ленти, се поставуваат сообрајни знаци и патокази, се монтираат еластичните огради и се поставуваат светилки на електричните столбови.
Директорот на ЈП за Државни патишта, Коце Трајановски за весникот ВЕЧЕР рече дека сечењето на лентата е планирано за в недела на пладне. Граѓаните и туристите кои патуваат кон Охрид веќе се возат по новиот коловоз.
На терен се работи интензивно и на останатиот дел од автопатот кој според официјалните информации би требало да заврши до крајот на 2026 година. Кај Ботун се решава проблемот со свлечиштата. Досега работите се одолговлекуваа поради недоволна координација меѓу надзорот и изведувачот на градежните работи, но со присуството на директорот Трајановски и стручните лица на ЈПДП на терен, резултатите се веќе очигледни.
Овој автопат е дел од западниот дел од коридорот 8 на кој работи и американско-турскиот конзорциум „Бехтел и Енка“. Се работи на делницата Тетово – Гостивар и на Гостивар – Букојчани каде што изведувачот интензивно работи следејќи ја динамиката што ја наметна ЈПДП со решавање на експропријацијата на земјиштето.
За комплетирање на коридорот 8 од Скопје до Охрид потребно е да се доигради автопатот од Кичево до Врбјани, но и делницата „Букојчани-Кичево и во моментов тече јавен повик за избор на изведувач. За делницата Требеништа – Ќафасан, според најавите, ќе се ревидира трасата со оглед дека постојниот проект го загрозува заштитениот статус на Охридско Езеро и на регионот.
Ако се работи со вакво темпо како досега, очекувањата на Владата се до 2027 година да бидат изградени сите овие делници и граѓаните да можат да возат по модерни и безбедни автопатишта.
